jaku lalau ngagai nembiak ke baru udah ngambi pemutus peresa SPM 2010..( Ehsan ari Utusan borneo -unit berita iban )

Pelajar udah tembu besekula

patut nyikap diri

PELAJAR NYULUT: Fatimah (tiga kiba) nyuaka setipikit ngagai pelajar SMK Julau, Lim Ka Ping ke bulih pemutus manah ba peresa SPM 2010, ensanus.

SARIKEI: Pelajar ke udah tembu sekula patut nyikap diri enggau penemu ke manah baka ba renggat ngatur pengawa, ngembuan pengelandik enggau tengan pengelandik ba mayuh macham pengawa ngambika rayat Sarawak enda semina nyadi orang ke meda aja lebuh pemansang majak ngerembai jemah ila.

Menteri ba Opis Kepala Menteri ke lalu nyadi Chairman Komiti Pemansang Pemansut Pengereja Pengawa Tembu Besekula Sarawak (MPSMLS), Datin Fatimah Abdullah madahka, pelajar ke udah tembu sekula nyadi reta enggau penatai pemansut pengereja pengawa ke amat beguna kelebih agi ba renggat kedua pemansang menua Sarawak.

“Pemansang SCORE ba taun 2013 deka begunaka raban pengereja pengawa urung 1.6 juta pengawa puang.

“Kena ngulihka juluk nya, perintah Sarawak sigi begunaka pengereja pengawa ke patut ngisi ba 10 bidang industri ke besai baka ngereja minyak, betanam betupi, pengawa berikan, industri dagang temuai, aluminium, pengawa dagang, akuakultur, agropolitan, pengawa pengerai, enggau pengawa servis enggau teknologi pemadah(ICT),” ku iya.

“Kita minta ngagai raban pelajar ngambika ulih beratika enggau manah sereta betul ba pekara milih pengawa enggau latih ke udah disediaka lalu patut ngembuan pengerindu, nitihka pematut (nitihka atur ditetapka) enggau pengulih ba diri empu ngambika enda nyadika penusah lebuh betapi ngatur pengidup sereta begulai enggau mensia mayuh,” ku Fatimah.

Ku iya nandu baru, nyulut ba pengawa pelajar mega ulih meri awak ke besai (bulih pengawa) ngagai sida enti sema begigaka kereja jemah ila.

Kelimpah ari nya mega, ku fatimah pemintar runding, ngembuan ulah ke manah sereta nemu bekaul enggau orang bukai endang beguna bendar ba diri empu lebuh deka ngangkatka diri ari orang bukai.

Fatimah bejaku munyi nya ba siti pengerami ‘Hari Peluang, Latihan Pendidikan dan Kerjaya’ (HPLP)renggat menua Sarikei beserimbai enggau pengawa mansutka pemutus peresa Sijil Pelajaran Malaysia (SPM) ke diatur ba Central Market Baru, Sarikei, apin lama tu tadi.

“Ngagai nembiak sekula enggau raban ke udah tembu besekula sekula tu, kitai ngarapka sida enda bebendar ba tengan jalai aja iya nya semina ba renggat SPM tang patut ngangkatka diri ngagai tikas ke tinggi agi ngambika mujur sereta bekualiti.

“Nguna meh awak ke bisi kena ngangkatka pengidup diri, bansa enggau menua,” ku Fatimah.